MƏQALƏLƏR

SDU-da “Dövlətlərarası iqtisadi əlaqələr: müasir çağırışlar və perspektivlər” mövzusunda beynəlxalq elmi konfrans keçirilib

  • 02.06.2023

Mayın 25-də Sumqayıt Dövlət Universitetində Ümummilli Lider Heydər Əliyevin anadan olmasının 100 illiyinə həsr olunmuş “Dövlətlərarası iqtisadi əlaqələr: müasir çağırışlar və perspektivlər” mövzusunda onlayn formatda beynəlxalq elmi konfrans keçirilib.
Konfransda millət vəkilləri: Azərbaycan İqtisadçılar İttifaqının sədri, akademik Ziyad Səmədzadə, Sosial İnkişaf Mərkəzinin İdarə Heyətinin sədri, dosent Vüqar Bayramov, “Azərbaycan Respublikasının Dağlıq Qarabağ Bölgəsinin Azərbaycanlı İcması” İctimai Birliyinin İdarə Heyətinin sədri Tural Gəncəliyev, o cümlədən Azərbaycan, Türkiyə, Rusiya, Makedoniya və digər ölkələrin aparıcı universitetlərinin iqtisadçı alimləri də iştirak ediblər.
Konfransı SDU-nun Elm və innovasiyalar üzrə prorektoru, professor Ramazan Məmmədov açaraq qonaqları salamlayıb, iştirakçılara rektor professor Elxan Hüseynovun salamını çatdırıb. Bildirib ki, “Heydər Əliyev İli” çərçivəsində Sumqayıt Dövlət Universitetində silsilə tədbirlər keçirilir. İqtisadiyyat və idarəetmə fakültəsinin təşkilatçılığı ilə keçirilən konfransın Ümummilli Lider Heydər Əliyevin anadan olmasının 100 illiyinə həsr olunduğunu vurğulayan prorektor görkəmli dövlət xadiminin ölkəmizin rifahı naminə gördüyü əvəzsiz xidmətlərdən danışıb. Bildirib ki, hazırda Azərbaycanın inkişaf yolu ötən əsrin 70-ci illərindən, Heydər Əliyevin həm Azərbaycanda, həm də SSRİ-də rəhbər vəzifələr tutduğu dövrdən başlayır. Bu gün Azərbaycan beynəlxalq aləmə sürətlə inteqrasiya edən, dinamik iqtisadi inkişafını və etibarlı siyasi sabitliyini təmin etmiş müstəqil dövlətdir. Artıq dünya birliyi Azərbaycanı mötəbər kürsülərdən öz sözünü deməyə, öz haqlı mövqeyini bildirməyə və qorumağa qadir, zəngin iqtisadi potensiala malik dövlət kimi tanıyır. Üçrəngli bayrağımız işğaldan azad olunmuş torpaqlarımızda qürurla dalğalanır, azad olunmuş torpaqlarımızda cənab Prezident İlham Əliyevin rəhbərliyi ilə yeni bir hünər dastanı yazılır, şəhər və kəndlərimiz dirçəlir. Qarabağ və Şərqi Zəngəzur genişmiqyaslı tikinti, inşaat, quruculuq meydanına çevrilib və “Böyük Qayıdış” proqramının gerçəkləşməsi ilə bu torpaqlarda həyat yenidən canlanmağa başlayıb. Bu da iqtisadiyyatımızın inkişafına böyük töhfələr verir.
Konfransın əhəmiyyətindən bəhs edən professor Ramazan Məmmədov onu da vurğulayıb ki, konfransın materialları sırasına Rusiya, Türkiyə, Makedoniya və s. universitetlərdən və respublikamızın 31 elm və ali təhsil müəssisəsindən 140 məruzə və tezis daxil olmuş, onlardan 130 məruzə və tezis Proqram komitəsi tərəfindən seçilərək və antiplagiat proqramı ilə yoxlanılaraq konfransın gündəliyinə qəbul edilmişdir. Ümid edirəm ki, məruzəçi və digər konfrans iştirakçılarının məzmunlu tədqiqatları, əldə etdikləri elmi nəticələri və praktik təklifləri müasir çağırışlar kontekstində dövlətlərarası iqtisadi əlaqələrin inkişafına əməli töhfə verəcək.
Azərbaycan İqtisadçılar İttifaqının sədri, akademik, Milli Məclisin deputatı Ziyad Səmədzadə “Müstəqillik illərində dövlətlərarası iqtisadi əlaqələrin genişləndirilməsində Heydər Əliyevin çoxşaxəli fəaliyyəti” mövzusunda geniş məruzə edib. Bildirib ki, Azərbaycanın müstəqil dövlət kimi inkişaf etməsi, əhalinin rifah halının yaxşılaşdırılmasının əsas şərtlərindən biri respublikanın iqtisadi potensialıdır. Vaxtilə Ulu Öndər müəllifi olduğu milli inkişaf strategiyasında iqtisadi sahədə qarşıda duran vəzifələri düzgün müəyyənləşdirmiş və məharətlə həyata keçirmişdir. Ulu Öndər hakimiyyətə qayıtdıqdan sonra gənc dövlətin siyasi və iqtisadi əsaslarını yaratmaqla yanaşı, Azərbaycan xalqının milli-mənəvi irsini özündə ehtiva edən ideyanın - azərbaycançılığın təşəkkül və inkişafına müstəsna diqqət verirdi.Ulu Öndər yubanmadan irimiqyaslı iqtisadi islahatlara start verdi, bu islahatların ardıcıl və sistemli şəkildə həyata keçirilməsi üçün mükəmməl qanunvericilik bazası yaradıldı və beynəlxalq tələblərə uyğunlaşdırıldı. Heydər Əliyevin rəhbərliyi ilə həyata keçirilən irimiqyaslı layihələr sırasında 1994-cü ildə imzalanmış “Əsrin müqaviləsi” adlı neft ixracı sazişi xüsusi yer tutur. Bu layihə Ümummilli Liderin Azərbaycanın iqtisadi qüdrətinin yüksəlməsinə, xalqın firavan yaşamasına dair həyata keçirdiyi əsas xidmətlərdən biri kimi tarixə düşmüşdür. Əsası Ümummilli Lider Heydər Əliyev tərəfindən qoyulmuş iqtisadi siyasət strategiyası bu gün dövlət başçısı cənab İlham Əliyev tərəfindən uğurla həyata keçirilir. Prezident cənab İlham Əliyevin başçılığı ilə aparılmış çoxsaylı islahatlar Azərbaycan Respublikasında sosial-iqtisadi durumun yaxşılaşmasına, əhalinin maddi vəziyyətinin daha da artmasına xidmət göstərir.
Milli Məclisin deputatları Vüqar Bayramov “Heydər Əliyev tərəfindən müəyyən edilən və milli mənafeyə xidmət edən iqtisadi layihələrin əhəmiyyəti”, Tural Gəncəliyev “Qarabağın dirçəldilməsinin regionun inkişafında strateji rolu”, Atatürk Universitetinin İqtisadi Siyasət Bölməsinin müdiri, prof. dr. Kerem Karabulut “Qarabağ və Şərqi Zəngəzurda iqtisadiyyat quruculuğunda Türkiyə-Azərbaycan əməkdaşlığının strateji aspektləri”, Rusiya Federasiyası Prezidenti yanında Rusiya Xalq Təsərrüfatı və Dövlət İdarəçilik Akademiyasının professoru, iqtisad elmləri doktoru, Rusiya Federasiyasının əməkdar elm xadimi, “Maliyyə iqtisadiyyatı” jurnalının baş redaktoru Vasiliy Bespyatıx “Heydər Əliyev müasir dövlətlərarası iqtisadi əlaqələrin görkəmli strateqidir”, Sumqayıt Dövlət Universitetinin İqtisadiyyat kafedrasının dosenti Səadət Hümbətəliyeva “Heydər Əliyev və Azərbaycanın xarici iqtisadi əlaqələri” mövzularında çıxış edərək, konfransın çox aktual məsələyə həsr olunduğunu bildiriblər. Qeyd ediblər ki, dövlətlərarası iqtisadi münasibətlər yalnız zəruri gəlirin əldə olunmasında deyil, həmçinin xarici siyasət, elm, mədəniyyət və digər sahələrdə strateji tərəfdaşları müəyyən edir. Avropa Birliyinə inteqrasiya, investisiya layihələrinin genişləndirilməsi, elm tutumlu sənaye sahələri və yüksək texnologiyaların inkişafının iqtisadi artıma və biliklər iqtisadiyyatının daha sürətlə formalaşmasına təkan verməsi beynəlxalq konfransda müzakirə olunan məsələlərdən olmuşdur.