|
Əməkdaşlıq əlaqələri genişlənir
Fevral ayının 23-də Vergilər Nazirliyində Fransanın Beynəlxalq Texniki Əməkdaşlıq Agentliyinin (ADETEF) yüksək vəzifəli əlaqələndiricisi, baş maliyyə müfəttişi Alain Bodonun rəhbərlik etdiyi nümayəndə heyəti ilə görüş keçirilmişdir. Görüşdə vergilər nazirinin müavini, 3-cü dərəcəli dövlət vergi xidməti müşaviri Sahib Ələkbərov və nazirliyin müvafiq struktur vahidlərinin rəhbərləri iştirak etmişlər.
S.Ələkbərov qonaqları salamlayaraq Azərbaycan və Fransanın vergi orqanları arasında sıx əlaqələrin qurulduğunu və bu münasibətlərin hər iki ölkə üçün faydalı olduğunu qeyd etmişdir. Bir neçə ay öncə Vergilər Nazirliyinin nümayəndə heyətinin Fransada səfərdə olduğunu xatırladan S.Ələkbərov bu səfərin onlarda xoş təəssürat yaratdığını vurğulamışdır. Bildirilmişdir ki, səfər çərçivəsində Fransanın vergi orqanlarının yüksək vəzifəli şəxsləri ilə görüşlər keçirilmiş, insan resurslarının idarə edilməsi, kadrların peşə hazırlığının yüksəldilməsi təcrübəsi ilə yaxından tanış olunmuşdur. Qonaqlara 1918-ci ildə Azərbaycanda Xalq Cümhuriyyəti yarandığı zamandan Fransa ilə normal münasibətlərin qurulduğu və hazırda da bu münasibətlərin yüksək səviyyədə davam etdiyi xatırladılmışdır. Nazir müavini ölkələrimiz arasında əməkdaşlığın bundan sonra da inkişaf etdirilməsinə böyük önəm verildiyini demişdir.
S.Ələkbərov bildirmişdir ki, fevral ayının 17-də Fransa Respublikasının paytaxtı Paris şəhərində bu ölkənin mədəniyyət naziri cənab Frederik Mittera və Azərbaycanın birinci xanımı, Heydər Əliyev Fondunun prezidenti Mehriban xanım Əliyevanın iştirakı ilə Azərbaycan Respublikasının müstəqilliyini yenidən bərpa etməsinin 20-ci ildönümünə və «Azərbaycan» kitabının təqdimatına həsr olunmuş təntənəli mərasimin keçirilməsi ölkələrimiz arasında münasibətlərə böyük önəm verildiyinin göstəricisidir.
Vergi xidməti əməkdaşlarının peşə bayramı münasibətilə keçirilən tədbir haqqında qonaqlara məlumat verən nazir müavini həmin tədbirdə 200-dən çox sahibkar, alim və iqtisadçının iştirak etdiyini bildirmişdir.
Dövlət başçısı cənab İlham Əliyev tərəfindən Vergilər Nazirliyi qarşısında qoyulmuş vəzifələr, o cümlədən nağdsız ödənişlərin stimullaşdırılması məqsədilə görüləcək işlər barədə də fransalı qonaqlara məlumat verilmişdir. Nazir müavini demişdir ki, Azərbaycanda Vergi Məcəlləsinə dəyişikliklər edilməsi, vergitutma bazasının genişləndirilməsi ilə bağlı işlər aparılır, vergi dərəcələrinin artırılması isə nəzərdə tutulmur.
ADETEF-nin yüksək vəzifəli əlaqələndiricisi Alain Bodon səmimi qəbula görə öz təşəkkürünü bildirmiş, Azərbaycan və Fransa arasında müxtəlif sahələrdə əməkdaşlığın mövcud olduğunu və müsbət nəticələrin əldə edildiyini demişdir. Nümayəndə heyətinin rəhbəri səfərin əsas məqsədinin ölkələrimiz arasında əlaqələrin daha da inkişaf etdirilməsi olduğunu vurğulamışdır. O, qeyd etmişdir ki, gələcəkdə hər iki ölkənin vergi administrasiyaları arasında təhsil və «elektron mühasibatlıq» sahələri istiqamətində işlərin aparılması üçün azərbaycanlı mütəxəssislərin Fransada tədris kurslarında iştirakı nəzərdə tutulur. Vergilər Nazirliyinin fəaliyyətini və həyata keçirilən islahatların yüksək qiymətləndirdiyini vurğulayan qonaq bundan sonra da hər iki ölkənin vergi orqanları arasındakı əməkdaşlığın yüksələn xətlə inkişaf edəcəyinə əminliyini bildirmişdir. Sonra Alain Bodon təmsil etdiyi təşkilatın fəaliyyəti barədə ətraflı məlumat vermişdir.
Bölgələrdə
Vergi ödəyicilərinə göstərilən xidmətlərin səmərəliliyinin artırılması və keyfiyyətinin yüksəldilərək dünya standartlarına uyğunlaşdırılması Vergilər Nazirliyinin daim diqqət mərkəzindədir. Bu istiqamətdə aparılan işlər çərçivəsində qarşıdan gələn iki il ərzində öz ərazisində vergi orqanı olmayan bütün rayon və iri şəhərlərimizdə vergi ödəyicilərinə xidmət terminallarının yaradılması planlaşdırılır. Ölkədə yaradılan bu cür xidmət məntəqələri dövlət-sahibkar münasibətlərinin inkişaf etdirilməsinə, sahibkarlığa dövlət dəstəyi mexanizmlərinin təkmilləşdirilməsinə və ən əsası, sahibkarların maarifləndirilməsinə, onların vergi haqqında biliklərinin artırılmasına müsbət təsir göstərir.
Qəzetimizin ötən nömrələrində əməkdaşlarımızın 4 saylı Ərazi Vergilər İdarəsinin əhatə dairəsinə daxil olan rayonlardan hazırladıqları materialları sizə təqdim etmişdik. Bu yazının ünvanı isə 10 saylı Ərazi Vergilər İdarəsinin əhatə dairəsinə daxil olan İsmayıllı rayonundakı vergi ödəyicilərinə xidmət terminalıdır. Bura vergi ödəyicilərinin istifadəsinə üç il əvvəl - 2008-ci il martın 18-də verilmişdir və onun fəaliyyətinin üstün cəhətləri, eləcə də çatışmazlıqları barədə fikir yürütmək üçün kifayət qədər təcrübə mövcuddur. Terminalın fəaliyyəti və göstərdiyi xidmətlər haqqında Sahibkarlar (İşəgötürənlər) Təşkilatları Milli Konfederasiyasının terminalda xidmət göstərən nümayəndəsi Səxavət Bağırov ətraflı məlumat verir. Xatırladaq ki, terminalda vergi ödəyicilərinə xidməti Konfederasiya və Vergilər Nazirliyi arasında imzalanmış partnyorluq sazişinə əsasən, bu qurumun nümayəndəsi həyata keçirir. S.Bağırovun sözlərinə görə, terminalın yaradılması ilə bu regionda yaşayan və fəaliyyət göstərən sahibkarların işi xeyli yüngülləşmişdir. Onlar vaxt itirmədən və uzaq yol qət etmədən vergi haqqında suallara terminalda cavab ala bilirlər: «İlk vaxtlar burada göstərilən vergi xidmətindən lazımınca istifadə etmək üçün rayondakı sahibkarlar arasında məlumatlandırma işlərinin aparılmasına ehtiyac var idi. Zəruri bilgiyə malik olmadıqları üçün ödəyicilər terminalın xidmətlərindən tam istifadə edə bilmirdilər. Ona görə də işimizin bir hissəsi vergi ödəyicilərini terminalın onlara yaratdığı imkanlar barədə məlumatlandırmaq idi. İndi isə bura hər kəs konkret məqsədlərlə müraciət edir. Göstərilən xidmətlər içərisində vergi bəyannamələrinin düzgün tərtib edilməsi və onların elektron formada göndərilməsi üstünlük təşkil edir. Bunu statistik göstəricilər də əyani nümayiş etdirir. Sahibkarların arzuları əsasında şəxsi vərəqələrinə baxıb vergi borcları haqqında mütəmadi olaraq onları məlumatlandırırıq. Bundan başqa, şikayət ilə bağlı sənədlərin və arayışların hazırlanmasında onlara yardım edirik». S.Bağırov vergi ödəyicilərinin köməyə ehtiyacı olduğu bir məsələni də vurğulayır. Terminalda bəyannamələrin düzgün tərtib edilməməsi ilə bağlı nazirlik tərəfindən daxil olan uyğunsuzluq məktublarının araşdırılması sahəsində də fəal iş aparılır: «Nəzarət-kassa aparatı işləmədiyi zaman qeydiyyat kitabının aparılması qaydaları haqqında ödəyicilərə ətraflı məlumat veririk. Vergi orqanı əməkdaşları ilə birlikdə ödəyicilər üçün müntəzəm treninqlər təşkil edir, qanunvericilikdə baş verən dəyişikliklər, Vergilər Nazirliyinin tətbiq etdiyi yeniliklər barədə onları məlumatlandırırıq. Məsələn, elektron vergi xidmətlərindən istifadə qaydaları ödəyicilərə izah olunur. Təcrübə göstərir ki, bəzən vətəndaşlar ödəyicisi olduğu vergi növü üzrə qanunla onlara verilən hansısa vergi güzəştlərindən istifadə hüququndan xəbərsiz olurlar və terminal bu sahədə onlara lazımi köməyi göstərir».
S.Bağırov qeyd edir ki, 2010-cu ilin yanvar ayından tətbiq olunan elektron hesab-fakturaların düzgün tərtib edilməsi üçün ödəyicilərlə müntəzəm iş aparılır.
Rəqəmlərin dili ilə
Statistikaya əsasən, İsmayıllıdakı vergi ödəyicilərinə xidmət terminalında sahibkarlara göstərilən ümumi xidmətlərin sayı 2009-cu ildə 4574, 2010-cu ildə isə 4607 olmuşdur. (2010-cu ildə ödəyicilərə göstərilən xidmətlərin növlər üzrə kəmiyyəti təqdim olunan qrafikdə faizlərlə göstərilmişdir). Maraqlı cəhət budur ki, 2010-cu illə müqayisədə 2009-cu ildə xidmət terminalına daha çox vətəndaş müraciət etmişdi (2009-cu ildə 1831; 2010-cu ildə 1819). Mütəxəssislər 2010-cu ildə bu göstəricinin nisbətən aşağı olmasını sahibkarlar arasında məlumatlılıq səviyyəsinin yüksəlməsi ilə izah edirlər.
Arzu İBRAHİMOVA
|
.jpg)
