|
Vergilər Nazirliyində işgüzar görüş
Ötən həftə Vergilər Nazirliyində dünyanın nüfuzlu hüquq, audit, maliyyə, vergi və konsaltinq qurumlarından biri hesab edilən «Ernst & Younq Holdinqs (SiAyEs) Bi.Vi» şirkətlər qrupunun nümayəndələri ilə nazirliyin rəhbər işçiləri arasında işgüzar görüş keçirilmişdir. Görüşdə «Ernst & Younq» konsaltinq şirkətinin ölkəmizdəki partnyoru Arzu Hacıyeva vergi qanunvericilyinə əlavə və dəyişikliklər edilməsi ilə bağlı təmsil etdiyi şirkətin təkliflərini təqdim etmiş, ƏDV, mənfəət vergisi, gəlir vergisi və ödəmə mənbəyində tutulan vergilərlə bağlı mülahizələrini söyləmişdir.
Vergilər nazirinin müavini Sahib Ələkbərov irəli sürülən fikirlərin nazirliyin müvafiq idarələri tərəfindən ciddi təhlil ediləcəyini bildirmişdir. Vergilər Nazirliyinin digər mütəxəssislərlə də daim müzakirələrə açıq olduğu qeyd edilmiş, irəli sürülən təkliflərin «Vergi Klubu» üzvləri tərəfindən müzakirəyə çıxarılmasının faydalı olacağı vurğulanmışdır.
Nazirliyin Vergi siyasəti və strateji araşdırmalar Baş İdarəsinin rəisi Akif Musayev Vergi Məcəlləsinə əlavə və dəyişikliklər edilməsi məqsədilə müxtəlif təşkilatlar və sahibkarlar tərəfindən 300-ə yaxın təklif irəli sürüldüyünü bildirmişdir. O, bütün təkliflərin ekspertlər tərəfindən müzakirəyə çıxarıldığını və «Ernst & Yanq»ın təkliflərinin də onlar üçün maraqlı olduğunu vurğulamışdır.
Qeyd. Bir əsrdən çox fəaliyyət tarixinə və böyük təcrübəyə malik «Ernst & Yanq» konsaltinq şirkəti dünyanın 140-dan çox ölkəsində fəaliyyət göstərən qlobal qurumlardan biridir. Şirkət Azərbaycan Respublikasında 1994-cü ilin fevral ayında fəaliyyətə başlayıb və ölkəmizdə audit, vergi və hüquq, əməliyyat və məsləhət sahəsində xidmət göstərir. Hazırda şirkətin Bakı ofisində 100-dən çox əməkdaşı çalışır və onun idarə olunmasına 5 partnyor (ortaq) rəhbərlik edir.
Rüfət MƏRDANOV
|
.jpg)
