SAĞLAMLIQ

Kim ağır metallarla qidalanır?

Britaniya alimləri  zəhərli sənaye tullantıları – qurğuşun, civə, sink, mislə qidalanan torpaq soxulcanları  aşkar etmişlər. Tədqiqat qrupunun üzvləri olan  Redinq universitetinin ekoloqlarının fikrincə, bu soxulcanlardan  çirklənmiş torpaqların təmizlənməsi üçün istifadə etmək olar. Bu canlılar tərkibində ağır metallar və insan üçün təhlükəli sayılan digər  maddələr olan qidaları asanlıqla həzm edirlər. Lakin  normal, çirklənməmiş torpaq  onlar üçün ölümə bərabərdir. Aparılan DNT analizi göstərir ki, həmin qeyri-adi canlılar soxulcanların yüksək zəhərlənmə şəraitində evolyusiyaya uğrayan xüsusi növüdür. Hətta maraqlı bir cəhət də budur ki, alimlərin sözlərinə görə, canlıların hər biri ayrı-ayrı sahələrdə ixtisaslaşmışlar, yəni  bir  növü qurğuşun, digər növü isə civə   yeyir və s.

Alimlər hesab edirlər ki, bu həşəratların  çoxaldılması zərərli torpaqlarda ekoloji sistemin bərpasına kömək edə bilər. Lakin bunun tam gözlənilən nəticə verəcəyinə qəti əminlik kifayət deyil.

Hazırladı: S.Aytən